«Nitsa» Liga 1'da qoldi. «Sent-Eten» javob bahsida yirik hisobda tor-mor etildi
Fransiya Liga 1 va Liga 2 oʻrtasidagi oʻtish turnirining javob uchrashuvi yakunlandi. Unda Liga 1 vakili «Nitsa» oʻz maydonida «Sent-Eten» jamoasini qabul qildi. Ushbu bahs mezbonlarning 4:1 hisobidagi yirik gʻalabasi bilan yakunlandi.
Uchrashuvning birinchi boʻlimida hisob ochilmadi. Ikkinchi boʻlimning 62-daqiqasida mezbonlar yarim himoyachisi Jonatan Kloss hisobni ochdi. 79-daqiqada «Sent-Eten» safida toʻp surayotgan Zuriko Davitashvili penaltini aniq amalga oshirib, muvozanatni tikladi.
Biroq oʻyin yakunida mezbonlar daxshatli temp namoyish etishdi. 81-daqiqada Kail Budash «Nicca»ni hisobda oldinga olib chiqqan boʻlsa, 87-daqiqada Elye Vai jamoasining uchinchi golini kiritdi. Uchrashuvga qoʻshib berilgan daqiqalarda (90+3) esa oʻsha Elye Vai dublini rasmiylashtirib, yakuniy nuqtani qoʻydi.
Jamoalarning dastlabki uchrashuvida 0:0 hisobi qayd etilgan edi. Ikki oʻyin natijasiga koʻra (4:1) gʻalaba qozongan «Nitsa» oʻz oʻrnini saqlab qoldi va kelgusi 2026/2027 yilgi mavsumda ham Fransiya Liga 1 musobaqasida ishtirok etish huquqini kafolatladi.
