Nik Voltemade “Yuventus”ga o‘tish uchun Italiyaga yo‘l oldi
“Nyukasl” hujumchisi Nik Voltemade faoliyatini “Yuventus”da davom ettirishga yaqin turibdi. 24 yoshli germaniyalik futbolchi tibbiy ko‘rikdan o‘tish va transferni yakunlash uchun Italiyaga yo‘l oldi. Bu haqda insayder Nikolo Skira xabar berdi.
Manbaga ko‘ra, “Yuventus” va “Nyukasl” futbolchining bir mavsumlik ijarasi bo‘yicha kelishuvga erishgan. Turin klubi ijara uchun ingliz jamoasiga 4 million yevro to‘laydi. Kelishuvda futbolchini sotib olish huquqi ko‘zda tutilmagan.
Agar tibbiy ko‘rik muvaffaqiyatli yakunlansa, Voltemade “Yuventus” bilan shartnoma imzolaydi va 2026/27-yilgi mavsumni Italiya klubida o‘tkazadi. “Yuventus” jismonan kuchli markaziy hujumchi izlayotgan edi va yakunda germaniyalik futbolchi variantida to‘xtadi.
Ma’lumot uchun, Nik Voltemade “Nyukasl” safiga 2025-yil yozida kelib qo‘shilgan. Uning ingliz klubi bilan amaldagi shartnomasi 2031-yil yoziga qadar mo‘ljallangan, Transfermarkt esa futbolchining bozor qiymatini 55 million yevroga baholamoqda.
