Neto «Yuventus»ga qaytishi mumkin
Neto ham «Yuventus»ga qaytishga tayyor ekanini bildirgan.
ФОТО: Getty images
«Botafogo»dan ketganidan keyin hozircha erkin agent maqomida bo‘lgan braziliyalik darvozabon Norberto Neto Yevropaga qaytishi mumkin. Bu haqda insayder Nikolo Skira ijtimoiy tarmoqlarda xabar berdi.
Manbaga ko‘ra, 37 yoshli golkiper bilan Turinning «Yuventus» klubi shartnoma imzolashi mumkin. «Keksa sinyora»ga Kamila Grabaraning jarohatidan keyin yangi darvozabon zarur bo‘lib qolgan. Polsha terma jamoasi a’zosi xochsimon bog‘lamlaridan jarohat olgan va uzoq muddatga safdan chiqqan.
Neto ham «Yuventus»ga qaytishga tayyor ekanini bildirgan. Braziliyalik darvozabon 2015–2017-yillar davomida Turin klubi sharafini himoya qilgan.
Neto Yevropada «Barselona», «Valensiya», «Bornmut» va «Fiorentina» kabi klublarda ham to‘p surgan.
