Navbahor stadioniga yangi chim bosilib, sharoitlar yanada yaxshilanmoqda
Yaqinlashib kelayotgan futbol mavsumiga puxta tayyorgarlik ko‘rish maqsadida "Navbahor" markaziy stadionida keng ko‘lamli ta'mirlash va obodonlashtirish ishlari amalga oshirilmoqda. Bu haqda Namangan viloyati hokimligi Axborot xizmati xabar berdi.
Jarayonni Namangan viloyati hokimi Shavkatjon Abdurazzoqov ko‘zdan kechirdi.
O‘rganish davomida chim yotqizish ishlarini jahon standartlari asosida olib borish, nafaqat futbolchilar, balki muxlislar uchun ham yetarli sharoit yaratish masalalariga e'tibor qaratildi. Bu bo‘yicha mas'ullarga aniq topshiriqlar berilib, ularning ijrosi qat'iy nazoratga olindi.
Shuningdek, muhandislik-kommunikatsiya tarmoqlarini tartibga keltirish va stadion hududining estetik ko‘rinishini yaxshilash bo‘yicha olib borilayotgan ishlarni tezlashtirish lozimligi ta'kidlandi.
