«Napoli» Allegrining xizmatlariga qiziqish bildirmoqda
Massimiliano Allegrining «Napoli»ga tayinlanish imkoniyatlari ortib bormoqda, deb xabar beradi Corriere della Sera nashri Calciomercato‘ga tayanib.
Garchi Mauritsio Sarri Antonio Kontening asosiy vorisi sifatida ko‘rilayotgan bo‘lsa-da, «Atalanta» ham unga da’vogarlik qilmoqda. Bu esa «Latsio» bosh murabbiyini qiyin tanlov qarshisida qoldirmoqda.
Bunday vaziyatda so‘nggi kunlarda «Napoli» sport direktori Jovanni Manna ayni damda «Milan»ni boshqarayotgan Allegri bilan kechki ovqat ustida uchrashuv o‘tkazdi. Suhbat davomida italiyalik mutaxassisga hali u milanliklar boshqaruvini qo‘lga olishidan avval — o‘tgan yili taklif qilingan ikki yillik shartnoma muhokama qilindi.
Neapolliklar hali ham bunday kelishuvga tayyor ekanliklarini Manna orqali bildirishdi. Biroq Allegrining o‘zi «Milan»dagi kelajagi borasida hali bir qarorga kelmagani sababli javob berishga shoshilmayapti. U «rossoneri» rahbariyati oldiga qator talablarni qo‘ygan va agar ular qabul qilinmasa, klubni tark etadi.
