Namangan viloyati hokimi «Navbahor» muxlislari bilan uchrashdi
Namangan viloyati hokimi, viloyat futbol assotsiatsiyasi prezidenti Shavkatjon Shokirjanovich Abdurazzoqov yangi mavsum oldidan “Navbahor” jamoasi fan-klubi a’zolari hamda faxriy muxlislar bilan uchrashuv o‘tkazdi.
“Markaziy” stadionning anjumanlar zalida bo‘lib o‘tgan uchrashuvda viloyat IIB boshlig‘i Shuxrat Aliyev, “Navbahor” PFK rahbariyati, yoshlar jamoalari murabbiylari va keng jamoatchilik vakillari ishtirok etishdi.
Uchrashuv davomida bo‘lajak mavsumga puxta tayyorgarlik ko‘rish, sevimli jamoamizni safar hamda uy uchrashuvlarida tartibli hamda ko‘tarinki ruhda qo‘llab-quvvatlash masalalari atroflicha muhokama qilindi.
Shuningdek, fan-klub a’zolari va faxriy muxlislar uchun yagona formalarni joriy etish, yangi, jarangdor shiorlarni yaratish,stadionda muxlislik madaniyatiga rioya qilish, yosh avlod o‘rtasida futbolga qiziqishni yanada rivojlantirish singari masalalar yuzasidan viloyat rahbari tomonidan tegishli ko‘rsatmalar berildi.
Yig‘ilishda muxlislar “Navbahor”ning so‘nggi yillardagi muvaffaqiyatlari, qo‘lga kiritilgan zafarlar va jamoa avvalgi obro‘sini tiklayotgani borasida mamnuniyat bilan so‘z yuritdilar. Ta’kidlanganidek, bugungi kunda “Navbahor” yurtimiz futbolida o‘ziga xos brendga aylangan.
