«MYU» vaqtinchalik bosh murabbiy lavozimiga yangi nomzod bilan muzokara olib bordi — Romano
Jurnalist va insayder Fabritsio Romano sobiq «Manchester Yunayted» yarimhimoyachisi Maykl Kerrik katta ehtimol bilan «qizil iblislar»ning vaqtinchalik bosh murabbiyi etib tayinlanishini ma’lum qildi. U ushbu lavozimda hozircha jamoani boshqarib turgan Darren Fletcherni oʻrniga keladi.
Manbaga ko‘ra, Kerrik klub rahbariyatida muhim rol o‘ynayotgan INEOS kompaniyasi hamda «Manchester Yunayted» boshqaruvi bilan muzokaralarni muvaffaqiyatli o‘tkazgan va ayni paytda asosiy nomzodlar ro‘yxatida yetakchilik qilmoqda.
Qayd etilishicha, «Manchester Yunayted» yangi murabbiy nomini joriy hafta e’lon qiladi. Kerrikning o‘zi ushbu lavozimni egallashga umid qilmoqda. Avvalroq vaqtinchalik bosh murabbiylikka asosiy da’vogar sifatida tilga olingan norvegiyalik mutaxassis Ole-Gunnar Sulsher ham rahbariyat qarorini kutmoqda.
Eslatib o‘tamiz, 5 yanvar kuni klub Ruben Amorim bilan xayrlashganini rasman e’lon qilgandi. Portugaliyalik mutaxassis «Manchester Yunayted»ni 2024 yil 11 noyabrdan 2026 yil 5 yanvargacha boshqargan.
