«MYU» va «Milan» Saudiyada oʻrtoqlik oʻyini oʻtkazishi mumkin

«Manchester Yunayted» 2026 yil fevral oyida Saudiya Arabistonida do‘stona o‘yin o‘tkazishi mumkin. Bu haqda The Times xabar berdi.

Manbaga ko‘ra, ingliz klubi taqvimida bo‘sh vaqt yuzaga kelgan va uni asosiy jamoa bilan Yaqin Sharq bo‘ylab tijoriy safar uchun ishlatish rejalashtirilmoqda.

Uchrashuv fevral oyining o‘rtalariga mo‘ljallangan. Saudiya tomoni bilan muzokaralar allaqachon bo‘lib o‘tgan, biroq rasmiy kelishuvlar hali imzolangan emas. Potensial raqib sifatida «Milan» jamoasi ko‘rib chiqilmoqda, bu esa o‘yinga qo‘shimcha maqom va muxlislar diqqatini oshiradi.

Agar kelishuvga erishilsa, uchrashuv klublarning Yevropadan tashqarida global ishtirokini kengaytirish va brendini mustahkamlash strategiyasining bir qismi bo‘ladi.

Nasrullo Karimov

Jurnalist