«MYU» qishda Malasiyani sotishni rejalashtirmoqda
«Manchester Yunayted» himoyachi Tiyrell Malasiyani joriy qishki transferlar oynasida qo‘yib yuborish imkoniyatini faol ko‘rib chiqmoqda. Bu haqda insayder Rudi Galetti X ijtimoiy tarmog‘idagi sahifasida xabar berdi.
Niderlandiyalik futbolchining klub bilan amaldagi shartnomasi yozda yakunlanadi. Demak, agar «MYU» qishki transfer davri tugaguniga qadar Malasiyani sotishga ulgurmassa, u mavsum oxirida hech qanday tovon puli evazisiz erkin agent sifatida jamoani tark etishi mumkin.
Manbalarga ko‘ra, himoyachiga Yevropaning turli chempionatlaridan bir nechta klublar, shuningdek Saudiya Arabistonidan ham qiziqish mavjud.
Eslatib oʻtamiz, Malasiya «Manchester Yunayted»ga 2022 yil yozida qo‘shilgan. U «qizil iblislar» safida o‘tgan davr mobaynida barcha turnirlar doirasida 47 ta o‘yin o‘tkazgan, biroq gol yoki assist qayd etmagan. Transfermarkt ma’lumotlariga ko‘ra, futbolchining bozor qiymati 8 million yevroga baholanmoqda.
