«MYU» Lyuk Shouga munosib oʻrinbosar topdi
Angliyaning «Manchester Yunayted» klubi kelasi yozgi transfer oynasida «Vest Hem»ning chap qanot himoyachisi Malik Diufni sotib olish imkoniyatlarini ko‘rib chiqmoqda. Bu haqda The Guardian nashri xabar bermoqda.
Manbaning ma’lum qilishicha, «qizil iblislar» 21 yoshli futbolchini Lyuk Shouga munosib raqobatchi sifatida ko‘rmoqda. Ta’kidlanishicha, mankunianliklar chap qanot himoyasini kuchaytirish masalasi bilan yarimhimoya chizig‘i uchun o‘yinchilar xarid qilinganidan so‘ng shug‘ullanishni rejalashtirgan.
Malik Diuf joriy mavsumda barcha turnirlar doirasida 30 ta uchrashuvda maydonga tushib, o‘z hisobiga 5 ta samarali uzatmani yozdirib qo‘ydi. Yosh himoyachining «Vest Hem» bilan amaldagi mehnat shartnomasi ancha uzoq muddatga, ya’ni 2030 yilning yoziga qadar imzolangan.
Transfermarkt portalida taqdim etilgan ma’lumotlarga ko‘ra, futbolchining ayni paytdagi bozor qiymati 28 million yevroni tashkil etmoqda. Kelasi mavsum oldidan tarkibni yoshartirishni maqsad qilgan «Manchester Yunayted» uchun Diuf asosiy nomzodlardan biri bo‘lib turibdi.
