«MYU» ketma-ket toʻrtinchi oʻyinda gʻalaba qozondi

Angliya Premyer-ligasining 25-turi doirasida «Manchester Yunayted» o‘z maydonida «Tottenhem»ni 2:0 hisobida mag‘lub etdi. Shu tariqa, «qizil iblislar» chempionatdagi ketma-ket to‘rtinchi g‘alabasini qo‘lga kiritishdi.

«Manchester Yunayted»ning ushbu muvaffaqiyatli seriyasi 22-turda «Manchester Siti» ustidan qozonilgan g‘alaba (2:0) bilan boshlangan edi. Shundan so‘ng, mankunianliklar «Arsenal» (3:2), «Fulhem» (3:2) va nihoyat «shporlar» bilan bahsda ijobiy natija qayd etishdi.

Endilikda Maykl Kerrik shogirdlari 10 fevral kuni 26-tur doirasida safarda «Vest Hem» mehmoni bo‘lishadi.

Ayni damda «Manchester Yunayted» 44 ochko bilan APL turnir jadvalida kuchli to‘rtlikdan (4-o‘rin) joy olgan.

Nasrullo Karimov

Jurnalist