Muhammad Saloh «Liverpul» qaydnomasidan chiqarib yuborildi
«Liverpul» hujumchisi Muhammad Saloh Chempionlar ligasi umumiy bosqichining 6-turida «Inter»ga qarshi o‘yin uchun jamoa qaydnomasidan chiqarib yuborildi. Bu haqda RMC Sport jurnalisti Fabris Xoukins X ijtimoiy tarmog‘ida ma’lum qildi.
Xabarga ko‘ra, mazkur qaror klub direktorlar kengashi va bosh murabbiy Arne Slot tomonidan qabul qilingan.
Avvalroq Saloh o‘zining jamoadagi roli borasida noroziligini bildirgan, shuningdek, Angliya Premyer-ligasining 15-turida «Lids Yunayted»ga qarshi 3:3 hisobida yakunlangan o‘yindan so‘ng bosh murabbiy Slotni tanqid qilgan edi.
Joriy mavsumda misrlik hujumchi «Liverpul» tarkibida 19 ta o‘yin o‘tkazib, 5 ta gol va 3 ta golli uzatma qayd etgan. Uning klub bilan amaldagi shartnomasi 2027-yilning yozigacha mo‘ljallangan.
