Moriyasu: “Braziliyaga hurmat bor, ammo biz chekinmaymiz”
Yaponiya terma jamoasi bosh murabbiyi Xadzime Moriyasu JCh-2026 1/16 finalida Braziliyaga qarshi kechadigan uchrashuv oldidan o‘z fikrlarini bildirdi.
Murabbiyning aytishicha, Yaponiya guruh bosqichidagi uchta og‘ir uchrashuvdan keyin pley-offga yo‘l oldi va endi turnirning mutlaqo yangi bosqichi boshlanmoqda. Moriyasu bu bosqichda har bir xato juda qimmatga tushishini yaxshi tushunishini ta’kidladi.
U Braziliyani alohida e’tirof etdi. Moriyasuning fikricha, raqib — besh karra jahon chempioni, katta tarixga ega va dunyo futbolidagi eng kuchli jamoalardan biri. Shunga qaramay, Yaponiya bu o‘yinda shunchaki himoyalanish yoki imkoniyat kutish uchun emas, balki g‘alaba uchun maydonga chiqadi.
Yaponiya murabbiyi o‘tgan yili Braziliya bilan o‘tkazilgan o‘rtoqlik uchrashuvida jamoasi g‘alaba qozonganini ham eslatdi. Ammo u bu safargi bahs ancha murakkab bo‘lishini tan oldi. Chunki mundial pley-offi — butunlay boshqa bosim va mas’uliyatni talab qiladigan maydon.
Moriyasu jamoa o‘z o‘yin tamoyillaridan voz kechmasligini bildirdi. Uning aytishicha, aynan shu futbol falsafasi Yaponiyaga ishonch beradi va kelajak avlodlarga ham meros bo‘lib qolishi kerak.
Bosh murabbiy Braziliya FIFA reytingida yuqorida ekanini, Yaponiya esa pastroq pog‘onada joylashganini tan oldi. Ammo u bunday farq jamoaning orzusi va ishonchini kamaytirmasligini aytdi.
“Ko‘pchilik bizni autsayder deb hisoblaydi. Lekin biz o‘z kuchimizga ishonamiz. Biz bu Jahon chempionatida g‘olib bo‘la olishimizga aminmiz”, — deya ta’kidladi Moriyasu.
Shuningdek, murabbiy uzoq parvozlar va qisqa tiklanish vaqti futbolchilarning jismoniy holatiga ta’sir qilishini aytdi. Braziliyada to‘rt kun, Yaponiyada esa uch kun dam olish imkoni bo‘lgan. Shunga qaramay, Moriyasu futbolchilar o‘yinga to‘liq tayyor ekanini bildirdi.
Yaponiya uchun Braziliyaga qarshi bahs nafaqat pley-offdagi navbatdagi o‘yin, balki jamoaning qanchalik o‘sganini ko‘rsatib beradigan katta sinov bo‘ladi.