Morgan Gibbs-Uayt — Angliya Premyer-ligasining aprel oyidagi eng yaxshi futbolchisi
«Nottingem Forest» yarimhimoyachisi Morgan Gibbs-Uayt Angliya Premyer-ligasida aprel oyining eng yaxshi futbolchisi deb topildi. Bu haqda APLning X ijtimoiy tarmog‘idagi rasmiy sahifasi xabar bermoqda.
Gibbs-Uayt o‘tgan oy davomida «Nottingem Forest»ning asosiy tarkibida uch bor maydonga tushib, «Aston Villa» (1:1), «Byornli» (4:1) hamda «Sanderlend» (5:0) jamoalariga qarshi bahslarda ishtirok etdi. Ushbu uchrashuvlarda kelib chiqishi yamaykalik bo‘lgan ingliz futbolchisi 4 ta gol urdi va bitta samarali uzatmani amalga oshirdi.
Muvaffaqiyatli seriya tufayli «o‘rmonchilar» Angliya chempionatining xavfli hududidan (chiqib ketish zonasi) yuqoriga ko‘tarilishga muvaffaq bo‘lishdi. Ayni damda jamoa 35 ta o‘yindan so‘ng 42 ochko jamg‘argan holda, turnir jadvalining 16-pog‘onasini egallab turibdi.
