“Milan” Leau transferi bo‘yicha “Galatasaroy”ga o‘z shartlarini qo‘ydi
“Galatasaroy” “Milan” hujumchisi Rafael Leauni o‘z safiga qo‘shib olish variantini ko‘rib chiqishda davom etmoqda. Portugaliyalik futbolchi Istanbul klubining asosiy transfer maqsadlaridan biri bo‘lib turibdi.
Jurnalist Matteo Moretto ma’lumotiga ko‘ra, “Milan” Leauni sotishga tayyor, biroq klub transfer bo‘yicha qat’iy shart qo‘ygan. “Rossonerilar” futbolchini faqat to‘liq transfer asosida qo‘yib yubormoqchi va uning uchun 50–60 million yevro talab qilmoqda.
Shuningdek, “Milan” Leauni keyinchalik majburiy sotib olish sharti bilan ijaraga berish variantini muhokama qilishni istamayapti. Shu sabab “Galatasaroy” futbolchini qo‘lga kiritishni xohlasa, italiyaliklar talab qilayotgan transfer summasiga yaqin taklif bilan chiqishi kerak bo‘ladi.
Avvalroq “Milan” Rafael Leau uchun 35 million yevrolik taklifni rad etgani haqida xabarlar tarqalgan edi. Portugaliyalik futbolchi 2019-yildan buyon “Milan” sharafini himoya qilib kelmoqda.
