Mendesh — JCh-2026da himoyachilar orasida eng ko‘p xavfli vaziyat yaratgan futbolchi
Portugaliya terma jamoasi himoyachisi Nunu Mendesh 2026 yilgi Jahon chempionatida o‘z pozitsiyasidagi barcha futbolchilardan ko‘ra ko‘proq aniq golli vaziyat yaratgan. Bu haqda Squawka ma’lum qildi.
Manbaga ko‘ra, Mendesh turnir davomida raqib darvozasi oldida 4 ta aniq golli imkoniyat yaratib, ushbu ko‘rsatkich bo‘yicha barcha himoyachilarni ortda qoldirmoqda.
Bundan tashqari, 23 yoshli futbolchi JCh-2026da o‘z hisobiga ham gol yozdirib qo‘ygan. U guruh bosqichining 2-turida O‘zbekistonga qarshi bahsda (5:0) 17-daqiqada jarima zarbasini aniq amalga oshirib, to‘g‘ridan-to‘g‘ri gol urgandi.
Portugaliya terma jamoasi Jahon chempionatining 1/8 finaliga yo‘l oldi. Roberto Martines shogirdlari 6-iyul kuni AQShning Texas shtati, Arlington shahridagi «AT&T Stadium» maydonida Ispaniyaga qarshi bahs olib boradi. Ushbu uchrashuv Toshkent vaqti bilan soat 22:00 da start oladi.
