Mbappening qachon safga qaytishi maʼlum boʻldi — manba
Madridning «Real» klubi rahbariyati chap tizzasidan jarohat olgan hujumchi Kilian Mbappening safga qaytish muddati bo‘yicha o‘z taxminlarini ma’lum qildi.
Cadena Ser nashrining xabariga ko‘ra, «qirollik klubi» fransiyalik forvardning 17 mart kuni «Manchester Siti»ga qarshi kechadigan Yevropa Chempionlar Ligasi 1/8 final javob uchrashuviga qadar tiklanishiga umid qilamoqda.
Manbaning taʼkidlashicha, Kilian Mbappe «shaharliklar»ga qarshi dastlabki uchrashuvda (11 mart) jamoasiga yordam bera olmaydi. Shuningdek, u Ispaniya La Ligasi doirasidagi «Xetafe» (2 mart) hamda «Selta» (6 mart) klublariga qarshi kechadigan bahslarni ham o‘tkazib yuborishi kutilmoqda.
Eslatib oʻtamiz, Kilian Mbappe 2024 yilning yozidan buyon «Real Madrid» sharafini himoya qilib kelmoqda. Bungacha u Fransiyaning «PSJ» va «Monako» klublarida to‘p surgan. Joriy mavsumda hujumchi klub miqyosida jami 33 ta uchrashuvda maydonga tushib, 38 ta gol urdi va 6 ta samarali uzatmani amalga oshirdi.
