Mbappe «Real»ga kelganidan buyon oltita «El Klasiko»ning beshtasida magʻlubiyatga uchradi
Madridning «Real» klubi hujumchisi Kilian Mbappe jamoaga kelganidan buyon «Barselona»ga qarshi o‘tkazilgan oltita o‘yinning beshtasida mag‘lubiyat alamini totib ko‘rdi. Navbatdagi muvaffaqiyatsizlik Ispaniya Superkubogi finaliga to‘g‘ri keldi — katalonlar «qirollik klubi»ni 3:2 hisobida mag‘lub etdi.
Uchrashuv Saudiya Arabistonining Jidda shahridagi «King Abdulla Sports City» stadionida bo‘lib o‘tdi. Bellashuvni bosh hakam Xose Munuera Montero boshqardi.
Mbappe final bahsini zaxirada boshladi va 76-daqiqada ispaniyalik Gonsalo Garsiya o‘rniga maydonga tushdi. Avvalroq fransiyalik hujumchi jarohati sababli musobaqaning yarimfinalini o‘tkazib yuborgandi.
Eslatib o‘tamiz, Kilian Mbappe «Real» safiga 2024 yil yozida Fransiyaning «PSJ» klubidan kelib qo‘shilgan. Joriy mavsumda u 24 ta uchrashuvda 29 ta gol urib, 5 ta golli uzatma amalga oshirdi.
