Mayamidagi ikki o‘yin kutilmagan natija bilan yakunlandi
26-martdan 27-martga o‘tar kechasi ATP Masters 1000 musobaqasi doirasida erkaklar o‘rtasida ikkita uchrashuv bo‘lib o‘tdi. Turnirning 1/16 final bosqichidagi birinchi o‘yinda jahon reytingida 2-o‘rinni egallagan germaniyalik Aleksandr Zverev va 18-pog‘onada turgan fransiyalik Artur Fils kortga tushishdi. Uchrashuv ikki soat davom etdi va 3:6, 6:3, 6:4 hisobida fransuz tennischisining g‘alabasi bilan yakunlandi. Endi Artur Fils 27-mart kuni soat 22:00da Yakub Mensik bilan 1/8 final o‘yinida bellashadi.
1/8 finalda jahon reytingida 24-o‘rinni egallab turgan argentinalik Fransisko Serundolo va jahonning 15-raqamli tennischisi bolgariyalik Grigor Dimitrov o‘rtasidagi uchrashuv bo‘lib o‘tdi. O‘yin uchta setda ikkita breyk bilan yakunlanib, bolgariyalik g‘alaba qozondi. Uchrashuv ikki soat-u qirq sakkiz daqiqa davom etdi.
Yakuniy hisob: 7:6 (6) 4:6 7:6 (3).
Endi Grigor Dimitrov Toshkent vaqti bilan 27-kundan 28-kunga o‘tar kechasi soat 1:10 da bo‘lib o‘tadigan Sebastyan Korda va Novak Jokovich o‘rtasidagi o‘yin g‘olibi bilan uchrashadi.
