Mauritsio Sarri «Atalanta» bosh murabbiyiga aylanishi mumkin
Italiyaning «Atalanta» klubi rahbariyati jamoaning hozirgi bosh murabbiyi Raffaele Palladino ishdan bo‘shatilgan taqdirda, uning o‘rniga asosiy nomzod sifatida Mauritsio Sarrini ko‘rmoqda. Bu haqda insayder Nikolo Skira xabar berdi.
Ma’lumotlarga ko‘ra, 67 yoshli Sarrining «Latsio» rahbariyati bilan munosabatlari keskinlashgan va u mavsum yakunida Rim klubini tark etishi kutilmoqda. Mauritsio Sarri 2025 yilning yozida «Latsio» boshqaruviga kelgan edi. O‘tgan davr mobaynida jamoa uning qo‘l ostida 41 ta o‘yin o‘tkazib, 16 g‘alaba, 13 durang va 12 mag‘lubiyat qayd etdi.
Rimliklar rahbariyati murabbiyning ishidan norozi, bunga asosiy sabab sifatida jamoaning kelasi mavsum uchun yevrokuboklarga yo‘llanma beruvchi o‘rinlardan quruq qolgani ko‘rsatilmoqda. Sarrining amaldagi shartnomasi 2027 yil yozigacha belgilangan bo‘lsa-da, uning muddatidan oldin iste’foga chiqish ehtimoli juda yuqori.
