Mareska “Manchester Siti” mashg‘ulotlariga yangilik kiritdi
“Manchester Siti” bosh murabbiyi Enzo Mareska jamoa mashg‘ulotlarini musiqa ostida o‘tkazishni yo‘lga qo‘ydi. Italiyalik mutaxassis bu orqali futbolchilar uchun yanada erkin va ijobiy muhit yaratishni maqsad qilgan. Mashg‘ulotlarda asosan raqs va haus yo‘nalishidagi musiqalar yangramoqda.
Musiqalarni futbolchilarning o‘zlari yoki jismoniy tayyorgarlik bo‘yicha murabbiylar tanlaydi. Klub bazasiga buning uchun katta ovoz kuchaytirgichlar ham o‘rnatilgan. Mareskaning fikricha, musiqa futbolchilarning kayfiyatiga ijobiy ta’sir qilib, mashg‘ulotlardagi ishchanlikni oshiradi.
Italiyalik murabbiy bu usuldan avval “Lester” va “Chelsi”dagi faoliyati davomida ham foydalangan. Endi esa u “Manchester Siti”da Pep Gvardiola davridan keyin jamoaga o‘ziga xos yangi muhit olib kirishga harakat qilmoqda. Mashg‘ulotlar uchun musiqa tanlash esa futbolchilar orasida o‘ziga xos an’anaga aylangan.
Ma’lumot uchun, Enzo Mareska “Manchester Siti” boshqaruvini Pep Gvardiolaning klubdagi o‘n yillik faoliyatidan so‘ng qabul qilib oldi. Uning qo‘l ostida jamoa 2026/27-yilgi Chempionlar Ligasi mavsumini “Portu” ustidan 2:0 hisobidagi g‘alaba bilan boshladi.
