\"Manchester Yunayted\" \"Yuventus\" hujumchisiga qiziqish bildirmoqda
"Manchester Yunayted" yozgi transfer oynasida hujum chizig‘ini kuchaytirish ustida ishlamoqda. Italiyalik jurnalist Rudy Galettining ma’lumotiga ko‘ra, ingliz grandi "Yuventus" hujumchisi Dushan Vlahovichni o‘z safiga qo‘shib olish imkoniyatini ko‘rib chiqmoqda. Futbolchining taxminiy transfer narxi 50 million yevroga baholanmoqda.
Manbaga ko‘ra, "Manchester Yunayted" rahbariyati serbiyalik hujumchini Ruben Amorim jamoasi hujumini kuchaytirish uchun asosiy nomzodlardan biri sifatida baholamoqda. Klub yaqin kunlarda transfer shartlari yuzasidan vaziyatni o‘rganishni davom ettiradi.
"Yuventus" esa futbolchini faqat o‘z talablariga mos keladigan taklif tushgan taqdirdagina qo‘yib yuborishga tayyor. Turin klubi 26 yoshli hujumchi uchun kamida 50 million yevro ishlab olishni maqsad qilgan.
Eslatib o‘tamiz, Dushan Vlahovich 2022-yilda "Fiorentina"dan "Yuventus" safiga kelib qo‘shilgan edi. O‘tgan mavsum davomida u barcha musobaqalarda jamoasi safida muhim o‘yinlarda ishtirok etib, Seriya A va Yevropa maydonlarida o‘zining asosiy hujumchilardan biri ekanini namoyish etdi.
