«Manchester Yunayted» tarixi haqida hujjatli serial suratga olinadi
Angliyaning mashhur «Manchester Yunayted» klubi tarixiga bag‘ishlangan hujjatli serial suratga olinishi rejalashtirilmoqda. Bu haqda The Athletic nashri xabar berdi.
Ma’lumotlarga ko‘ra, loyiha ustida Lionsgate kinokompaniyasi ish olib boradi. Serial mashhur «Toj» («The Crown») loyihasi uslubida — ya’ni real tarixiy voqealarni dramatik hikoya formatida tasvirlash asosida yaratiladi. Ushbu serial Buyuk Britaniya qirolichasi Yelizaveta II hayotiga bag‘ishlangani bilan tanilgan.
Manbaga ko‘ra, agar loyiha yirik striming platformalardan biri tomonidan sotib olinib, namoyish etilsa, «Manchester Yunayted» klubi bir necha million dollar miqdorida kafolatlangan daromad oladi. Hozircha serial ishlab chiqarish bosqichi dastlabki rivojlantirish jarayonida.
Shuningdek, royalti miqdori buyurtma qilingan va suratga olingan mavsumlar soni hamda distributsiya shartnomasining ko‘lamiga qarab oshib borishi mumkin.
