«Manchester Yunayted» Kazemiro oʻrniga «Vulverxempton» yarimhimoyachisini sotib olmoqchi
«Manchester Yunayted» klubi «Vulverxempton»ning 27 yoshli markaziy yarimhimoyachisi Joau Gomesni sotib olish imkoniyatlarini jiddiy ko‘rib chiqmoqda. Braziliyalik futbolchi «qizil iblislar» e’tiborini tortgan bo‘lib, klub rahbariyati uni Kazemiro ketganidan so‘ng tarkibni kuchaytira oladigan asosiy nomzodlardan biri deb hisoblamoqda. Bu haqda Caught Offside nashri xabar bermoqda.
Hozircha «Man Yunayted» «Vulverxempton» bilan muzokaralarni boshlashni rejalashtirmayapti. Klub mavsum yakunida «bo‘rilar»ning Premyer-ligadan tushib ketish-ketmasligi bo‘yicha natijalarni kutmoqda. Agar «Vulverxempton» quyi ligaga ravona bo‘lsa, bu muzokaralar jarayonini sezilarli darajada osonlashtiradi va futbolchining narxi pasayishiga xizmat qiladi.
Joriy mavsumda Gomes «Vulverxempton» safida 35 ta o‘yinda maydonga tushib, 1 ta gol urdi va 3 ta golli uzatmani amalga oshirdi. Uning klub bilan amaldagi shartnomasi 2030 yilga qadar mo‘ljallangan bo‘lib, Transfermarkt portali futbolchining bozor qiymatini 35 million yevroga baholamoqda.
