“Manchester Yunayted” Jan-Filipp Matetani nishonga oldi
“Manchester Yunayted” hujum chizig‘ini kuchaytirish maqsadida “Kristal Pelas” forvardi Jan-Filipp Matetaga qiziqish bildirmoqda. Manchester klubi fransiyalik futbolchini Benjamin Sheshko uchun raqobatni oshira oladigan variantlardan biri sifatida ko‘rib chiqmoqda. Bu haqda TEAMtalk nashri xabar bermoqda.
Manbaga ko‘ra, 29 yoshli hujumchi “Manchester Yunayted” sport direktori Jeyson Uilkoksning transfer ro‘yxatidan joy olgan. Klub yangi markaziy hujumchi sotib olish imkoniyatlarini o‘rganmoqda, biroq ushbu pozitsiya uchun ajratiladigan mablag‘ cheklangan — jamoaning asosiy transfer ustuvorligi yarim himoyani kuchaytirish bo‘lib qolmoqda.
“Manchester Yunayted” va Matetaning vakillari o‘rtasida dastlabki aloqalar ham bo‘lib o‘tgan. Hozircha muzokaralar rasmiy taklif bosqichiga o‘tmagan. Fransiyalik futbolchi Premyer-ligadagi tajribasi va jismoniy imkoniyatlari sabab Manchester klubi uchun hujum chizig‘ini kuchaytirish variantlaridan biri sifatida baholanmoqda.
Ma’lumot uchun, Mateta 2026/27-yilgi APL mavsumida hozircha atigi 1 ta uchrashuvda 62 daqiqa maydonda harakat qildi va gol ura olmadi — shundan so‘ng jarohat sabab safdan chiqdi. Uning “Kristal Pelas” bilan shartnomasi 2027-yil yozigacha amal qiladi, Transfermarkt futbolchining bozor qiymatini 30 million yevroga baholamoqda.
