«Manchester Yunayted» «Barselona»ning Reshford borasidagi taklifini rad etadi
«Manchester Yunayted» klubi hujumchi Markus Reshfordning ijarasini yana bir mavsumga uzaytirish borasidagi «Barselona» taklifini rad etishga qaror qildi. Bu haqda Mirror nashri xabar bermoqda.
Avvalroq Daily Mail nashri «ko‘k-anorranglilar» 26 million funt sterling (30 million yevro) miqdoridagi to‘liq to‘lovni amalga oshirmaslik uchun ingliz futbolchisini yana bir yilga ijaraga olishni ko‘zlayotgani haqida xabar bergan edi.
Biroq Mirror’ning yangi ma’lumotlariga ko‘ra, «qizil iblislar» kataloniyaliklar oldiga qat’iy talab qo‘ygan: «Barselona» yo belgilangan 26 million funtni to‘lashi, yoki iyun oyida Reshfordni Manchesterga qaytarishi lozim.
Eslatib o‘tamiz, «Barselona» 28 yoshli hujumchini 2025 yilning yozida ijaraga olgan edi. Joriy mavsumda Reshford barcha turnirlarda 38 ta o‘yinda maydonga tushib, 10 ta gol va 13 ta samarali uzatmani amalga oshirdi. Transfermarkt portali ma’lumotlariga ko‘ra, futbolchining ayni damdagi bozor qiymati 40 million yevroni tashkil etadi.
