«Manchester Siti» Rodri bo‘yicha «Barcelona»ning taklifini rad etdi
«Manchester Siti» klubi yarim himoyachi Rodri bo‘yicha «Barcelona»dan tushgan dastlabki taklifni rad etdi. Bu haqda jurnalist Ben Jeykobs o‘zining X sahifasida ma’lum qildi.
Manbaga ko‘ra, kataloniyaliklar 30 yoshli ispaniyalik yarim himoyachi uchun taxminan 45 million yevro taklif qilgan. Biroq shaharliklar futbolchini kamida 75 million yevroga baholamoqda.
Xabar qilinishicha, «Barcelona» yaqin vaqt ichida yaxshilangan taklif bilan yana muzokaralarga qaytishni rejalashtirmoqda va transferning amalga oshishiga optimistik ruhda qaramoqda. Shuningdek, Rodri shaxsiy shartnoma shartlari bo‘yicha kataloniyaliklar bilan kelishuvga erishgani aytilmoqda.
2025/2026 yilgi Angliya Premer-ligasi mavsumida Rodri 21 ta uchrashuvda maydonga tushib, 1 ta gol urgani ma’lum.
