\"Manchester Siti\" Gvardiol bilan shartnomani uzaytirdi
"Manchester Siti" markaziy himoyachisi Yoshko Gvardiol bilan yangi shartnoma imzolaganini rasman e’lon qildi. Yangi kelishuvga ko‘ra, xorvatiyalik futbolchi 2031-yilga qadar ingliz klubi safida qoladi. Avvalroq unga Madridning "Real" klubi qiziqish bildirayotgani haqida xabarlar tarqalgan edi.
Gvardiol "Manchester Siti"ga 2023-yil yozida kelib qo‘shilgan. Shu vaqtga qadar u jamoa safida barcha musobaqalarda 122 ta uchrashuv o‘tkazib, 13 ta gol urdi va 10 ta golli uzatmani amalga oshirdi. Transfermarkt portaliga ko‘ra, himoyachining bozor qiymati 70 million yevroga baholanmoqda.
23 yoshli futbolchi faoliyati davomida Zagrebning "Dinamo" va Germaniyaning "RB Leypsig" klublarida ham to‘p surgan. Gvardiol ayni paytda "Manchester Siti" himoya chizig‘ining asosiy futbolchilaridan biri hisoblanadi.
