Ma'lum bo‘lishicha, BAAga qarshi o‘yin oldidan O‘zbekiston terma jamoasi mehmonxonasiga nega ofitser kelgan
Avval xabar qilinganidek, BAAga qarshi o‘yin arafasida O‘zbekiston terma jamoasi joylashgan mehmonxonaga doping-ofitserlar tashrif buyurdi. Ushbu holat yuzasidan tushuntirish berish maqsadida O‘zbekiston futbol assotsiatsiyasi qoshidagi «Tibbiyot qo‘mitasi» raisi va «Lokomotiv» PFK bosh shifokori Abror Pirriyev rasmiy bayonot berdi.
Pirriyevga ko‘ra, shunday doping-tekshiruvlar jahon futbolida keng qo‘llaniladigan va reglamentda belgilangan amaliyot hisoblanadi. Qayd etilishicha, saralash uchrashuvlari kabi muhim bahslar oldidan doping-nazorat o‘tkazilishi FIFA talablaridan biri bo‘lib, bu jarayon Osiyo futbol konfederatsiyasi (OFK) vakolatiga kiradi.
«Tibbiyot qo‘mitasi» raisi asossiz mish-mish va taxminlarga e’tibor qilmaslikka chaqirdi. Uning ta’kidlashicha, hozirgi paytda eng muhimi — butun e’tibor va his-tuyg‘ularni stadiondagi o‘yinga qaratish, jamoaga kuchli qo‘llab-quvvatlash ko‘rsatishdir.
Pirriyev terma jamoa futbolchilari zimmasiga tushayotgan ulkan mas’uliyatni ham alohida qayd etdi. Bunday vaziyatda eng katta yordam — muxlislar ishonchi, ularning qo‘llab-quvvatlashi va ijobiy muhit yaratish bo‘ladi. U barcha fanatlarni jamoa bilan birga bo‘lishga va ularni maydonda tinimsiz qo‘llab-quvvatlashga chaqirdi.
