Makelele \"Real\"ga qaysi futbolchi uchun pul sarflash kerakligini aytdi
"Real Madrid" afsonasi Klod Makelele madridliklar transfer bozorida qaysi turdagi futbolchiga ustuvor e'tibor qaratishi kerakligini aytdi.
Fransiyalik sobiq yarim himoyachi fikricha, jamoaga hujum va himoya o‘rtasini bog‘lay oladigan, to‘pni oldinga olib chiqadigan va raqib chiziqlarini yorib o‘tishga qodir markaziy yarim himoyachi yetishmayapti. Makelelening ta'kidlashicha, aynan shunday futbolchi "Real"ning o‘yinini yangi bosqichga olib chiqishi mumkin.
Uning so‘zlariga ko‘ra, hozirgi tarkibda Kilian Mbappe ko‘pincha to‘pni qabul qilish uchun orqaroqqa qaytishga majbur bo‘lmoqda. Natijada jamoa eng xavfli hujumchisidan jarima maydoni ichida to‘liq foydalana olmayapti. Shu sababli "Real" aynan shu pozitsiya uchun mablag‘ sarflashi kerak.
Shuningdek, Makelele Orelyen Tchuamenini jamoaning o‘tgan mavsumdagi eng barqaror futbolchilaridan biri sifatida alohida e'tirof etib, uning yangi shartnoma imzolagani to‘g‘ri qaror bo‘lganini ham ta'kidladi.
