Luis de la Fuente: «AI-modellardan ko‘ra ko‘proq insonlarga ishonaman»
Ispaniya terma jamoasi bosh murabbiyi Luis de la Fuente Jahon chempionati favoritlarini aniqlashda sun’iy intellekt modellaridan ko‘ra ko‘proq insonlarga ishonishini ma’lum qildi.
«Sun’iy intellekt — kelajak, nazarimda bu ajoyib, lekin men insonlarga ko‘proq ishonaman. Professional mutaxassislar yoki ommaviy axborot vositalari nima deyayotganini ko‘proq qadrlayman.
Mening fikrimcha, bu safargi Jahon chempionati tarixiy voqea bo‘ladi, chunki juda ko‘p jamoalarda — Fransiya, Angliya, Argentina, Braziliya, Marokash, Ispaniya, Portugaliya, Senegalda g‘alaba uchun imkoniyat bor… Bu juda og‘ir Jahon chempionati bo‘ladi, biroq biz ham chempionlik uchun kurasha olishimizni his qilyapmiz», — deya de la Fuentening so‘zlarini keltiradi Marca nashri.
Eslatib oʻtamiz, avvalroq Opta superkompyuteri Ispaniya terma jamoasini JCh-2026 favoriti deb atagan va uning chempionlik imkoniyatini 16,1% ga baholagan edi.
