London klubi Rodrigo transferi uchun 85 mln yevro taklif qildi
Madridning “Real” klubi futbolchisi Rodrigo Goes faoliyatini Angliya Premer-ligasida davom ettirishi mumkin. Bu haqda Fichajes nashri xabar berdi.
Manbaga ko‘ra, braziliyalik vingerga “Tottenhem” jiddiy qiziqish bildirmoqda.
Unga ko‘ra, londonliklar Rodrigoni qishki transfer oynasi vaqtida jamoaga olib kelishni istamoqda. Buning uchun ingliz klubi “Real”ga 85 million yevro to‘lashga tayyor ekanligini bildirgan.
O‘z navbatida, futbolchining o‘zi ham faoliyatini boshqa jamoada davom ettirmoqchi. U jahon chempionati oldidan yuqori formaga kirishni istamoqda.
Rodrigaga nafaqat “Tottenhem”, balki “Manchester Siti” va “Liverpul” ham qiziqish bildirmoqda.
Forvard joriy mavsum “Real Madrid” safida jami 13 ta uchrashuvda maydonga tushib, ikkita golli uzatma muallifiga aylangan. Uning klub bilan shartnomasi 2028 yilning yozigacha amal qiladi.
