«Liverpul»da Salohni oʻrnini bosishi mumkin boʻlgan asosiy nomzodlar roʻyxati eʼlon qilindi
«Liverpul» klubi joriy mavsum yakunida jamoani tark etishini e’lon qilgan Muhammad Salohning o‘rnini bosishi mumkin bo‘lgan futbolchilarni qidirishni boshladi. Jurnalist Fabris Xoukins misrlik yulduzga muqobil sifatida ko‘rilayotgan asosiy nomzodlar nomini ma’lum qildi.
«Maykl Olise barcha yirik Yevropa klublarining transfer ro‘yxatida birinchi o‘rinda turibdi, biroq «Bavariya» uni qo‘yib yubormoqchi emas. Shuningdek, Yan Diomand va Fransishku Konseysau kabi bir qator yosh iqtidorli futbolchilar ham kuzatuv ostiga olingan.
O‘tgan yili «mersisaydliklar» «Pari Sen-Jermen» a’zosi Bredli Barkolyaga qiziqish bildirgan edi. Hozirda u o‘z klubi bilan shartnomani uzaytirish bo‘yicha muzokaralar olib bormoqda. Yirik klublar ushbu muzokaralar jarayonini diqqat bilan kuzatib borishmoqda va agar tomonlar kelisha olmasa, vaziyatdan unumli foydalanib qolishga tayyor turibdi», — deb yozdi Xoukins o‘zining X ijtimoiy tarmog‘idagi sahifasida.
Eslatib oʻtamiz, avvalroq misrlik hujumchi joriy mavsum oxirida mersisaydliklar safini tark etishini eʼlon qilgandi.
