«Liverpul» soʻnggi daqiqalarda urilgan gollar boʻyicha APL rekordini oʻrnatdi
Angliya Premyer-ligasining 27-turi doirasida «Liverpul» safarda «Nottengem Forest» ustidan qiyin va muhim g‘alabani qo‘lga kiritdi. Uchrashuvdagi yagona golni 90+7-daqiqada yarimhimoyachi Aleksis Makallister raqib darvozasiga joylab qo‘ydi.
Opta Sport taqdim etgan ma’lumotlarga ko‘ra, 2025/2026 yilgi mavsumda «Liverpul» ishtirokidagi o‘yinlarda allaqachon 7 ta g‘alaba goli 90-daqiqadan so‘ng kiritilgan. Ularning 3 tasini «Liverpul» futbolchilari, 4 tasini esa raqib jamoalar urgan. Bu ko‘rsatkich Premyer-liga tarixida bir mavsum davomida bitta jamoa ishtirokidagi o‘yinlarda qayd etilgan eng yuqori natijadir.
Ushbu g‘alabadan so‘ng «Liverpul» 45 ochko bilan Angliya chempionati turnir jadvalida 6-o‘rinni egallab turibdi. «Nottengem Forest» esa 27 ochko bilan 17-pog‘onadan joy olgan.
