«Liverpul» Kyezaning kelajagi borasida qarorini oʻzgartirdi
Angliyaning «Liverpul» klubi rahbariyati italiyalik hujumchi Federiko Kyezaning kelajagi borasida dastlabki rejasini oʻzgartirdi. Bu haqda Football Insider nashri xabar bermoqda.
Manbaga koʻra, avvaliga 27 yoshli vinger yanvar oyida klubni tark etib, boshqa jamoada muntazam oʻyin amaliyotiga ega boʻlishi kutilgandi. Biroq hozirda mersisaydliklar uni jamoada saqlab qolish tarafdori boʻlib turibdi. Bunga futbolchining soʻnggi oʻyinlari sabab boʻlmoqda.
Eslatib oʻtamiz, Kyeza 2024 yilning yozidan buyon «Liverpul»da toʻp surmoqda. U joriy mavsum barcha turnirlarda 6 ta oʻyinda maydonga tushib, 2 ta gol urdi va 2 ta golli uzatmani amalga oshirdi.
Italiyalik vingerning mersisaydliklar bilan tuzgan amaldagi shartnomasi 2028 yilning oʻrtalarida yakuniga yetadi. Transfermarkt maʼlumotlariga koʻra, Kyezaning bozor qiymati 14 million yevroni tashkil etadi.
