«Liverpul» bor eʼtiborini «Atalanta» yarimhimoyachisiga qaratdi
Angliyaning «Liverpul» klubi qishki transfer oynasida Italiya A Seriyasi vakili «Atalanta» yarimhimoyachisi Edersonni sotib olishga kirishishi mumkin. Bu haqda Football Insider xabar bermoqda.
Manbaning ta’kidlashicha, «qizillar» bosh murabbiyi Arne Slot jamoaga jismonan kuchliroq va atletikroq yarimhimoyachi qo‘shishni istamoqda. Uning fikricha, hozirgi tarkibdagi futbolchilar bu talablarga to‘liq javob bermayapti.
«Atalanta» Edersonni sotishni xohlamasa-da, qish mavsumida kelib tushishi mumkin bo‘lgan takliflarga tayyorlanmoqda. Shuningdek, braziliyalik yarimhimoyachini qo‘lga kiritish borasida «Liverpul»ning asosiy raqobatchisi sifatida «Nyukasl» tilga olinmoqda.
Ederson joriy mavsumda barcha turnirlar doirasida 13 ta o‘yinda maydonga tushib, 1 ta gol va 1 ta golli uzatma qayd etgan. Uning klub bilan amaldagi shartnomasi 2027 yil yozigacha mo‘ljallangan. Transfermarkt ma’lumotlariga ko‘ra, futbolchining bozor qiymati 45 million yevroni tashkil etadi.
