«Lids» «Liverpul»ning toʻrtta oʻyindan iborat gʻalabali seriyasiga chek qoʻydi
Angliya Premer-ligasining 19-turi doirasida «Liverpul» va «Lids Yunayted» jamoalari o‘rtasidagi uchrashuv 0:0 hisobidagi durang bilan yakunlandi. Shu tariqa, «Lids Yunayted» «Liverpul»ning barcha musobaqalarda qayd etilgan to‘rt o‘yinlik g‘alabali seriyasiga barham berdi.
Bungacha «qizillar» Chempionlar ligasida Italiyaning «Inter» jamoasini 1:0 hisobida mag‘lub etgan, shuningdek Angliya chempionatida «Brayton» (2:0), «Tottenhem» (2:1) va «Vulverxempton» (2:1) ustidan g‘alaba qozongandi.
Hozirda «Lids Yunayted» Angliya chempionati turnir jadvalida 16-o‘rinda bormoqda. Jamoa 19 ta o‘yindan so‘ng 21 ochko jamg‘argan. «Liverpul» esa 33 ochko bilan to‘rtinchi pog‘onani egallab turibdi. Turnir jadvalida peshqadamlikni 45 ochkoga ega «Arsenal» qo‘lga kiritgan.
