Li Kan In Edan Azarning mundialdagi natijasini takrorladi
Janubiy Koreya terma jamoasi yarimhimoyachisi Li Kan In JCh-2026 «A» guruhi doirasidagi Chexiyaga qarshi uchrashuvda (2:1) 5 ta muvaffaqiyatli aldamchi harakatni amalga oshirdi va raqiblarini oʻziga nisbatan 4 marotaba fol ishlatishga majbur qildi. Shu tariqa, vinger Belgiya terma jamoasining sobiq hujumchisi Edan Azarning koʻrsatkichini takrorlashga muvaffaq boʻldi. Bu haqda OptaJoe xabar tarqatdi.
Belgiyalik vinger bunday statistikaga JCh-2018 yarimfinali doirasidagi Fransiyaga qarshi oʻyinda (0:1) erishgan edi. Eʼtiborlisi, Qatarda boʻlib oʻtgan soʻnggi Jahon chempionatida birorta ham futbolchi bir uchrashuvda bunday miqdordagi texnik-taktik harakatlarni amalga oshira olmagan.
Ushbu gʻalabadan soʻng Janubiy Koreya 3 ochko jamgʻargan holda turnir jadvalida ikkinchi oʻrinda bormoqda. Chexiya hisobida esa ochko mavjud emas va jamoa uchinchi pogʻonani band etgan. Guruhda esa avvalroq JAR ustidan gʻalaba qozongan (2:0) Meksika terma jamoasi peshqadamlik qilmoqda.
Eslatib oʻtamiz, futbol boʻyicha 2026-yilgi Jahon chempionati 11-iyundan 19-iyulga qadar AQSH, Kanada va Meksika maydonlarida oʻtkazilmoqda. Amaldagi dunyo chempioni Argentina terma jamoasi hisoblanadi. 2022-yilgi sayyora birinchiligi finalida Argentina milliy jamoasi Fransiya bilan toʻqnash kelgan edi. Oʻshanda dramatik kechgan oʻyinning asosiy vaqti 3:3 hisobida yakunlangan, biroq penaltilar seriyasida argentinaliklar raqibdan ustun kelishgan (4:2).
