«Lester Siti» Angliyaning uchinchi divizoniga tushib ketdi
«Lester» Angliyaning uchinchi divizioniga tushib ketdi. Chempionshipning 44-turidan so‘ng «tulkilar» 42 ochko jamg‘arib, musobaqa jadvalining oxirgi oldi — 23-pog‘onasini egallab turibdi. Turnir yakuniga qadar ikki tur qoldi. 21-o‘rinda borayotgan «Blekbern Rovers» esa 44 ta uchrashuvda 49 ochko to‘plagan. Shu tariqa, «Lester» ligada qolish uchun matematik imkoniyatlarini butunlay yo‘qotdi.
O‘tgan mavsumda «tulkilar» Angliya Premyer-ligasida ishtirok etishgan edi. Chempionat yakuniga ko‘ra jamoa 25 ochko bilan 18-o‘rinni egallab, Chempionshipga tushib ketgandi.
Fevral oyida 2023/2024 yilgi mavsumdagi moliyaviy barqarorlik va foyda ko‘rish qoidalarini buzgani uchun klubdan olti ochko olib tashlangan edi.
Ma’lumot uchun, 2015/2016 yilgi mavsumda «Lester» Angliya chempioni bo‘lgan edi. O‘shanda Klaudio Ranyeri shogirdlari 38 turda 81 ochko jamg‘arib, eng yaqin ta’qibchisi «Arsenal»ni 10 ochkoga ortda qoldirgan holda g‘oliblikka erishgan edi.
