La Liga. «Barselona» «Real»ni mag‘lub etib, muddatidan avval chempionlikni qoʻlga kiritdi
Ispaniya La Ligasining 35-turi doirasida markaziy bahs — «Barselona» va Madridning «Real» jamoalari o‘rtasidagi uchrashuv yakunlandi. «Spotifay Kamp Nou» stadionida bo‘lib o‘tgan o‘yinni bosh hakam Alexandro Ernandes boshqarib bordi. Mazkur bahsda maydon egalari 2:0 hisobidagi ishonchli g‘alabani qo‘lga kiritishdi.
Uchrashuvning 9-daqiqasida «Barselona» hujumchisi Markus Reshford hisobni ochgan bo‘lsa, 18-daqiqada Ferran Torres «ko‘k-anorranglilar»ning ustunligini mustahkamladi. Yakuniy hisob — 2:0.
Ushbu g‘alabadan so‘ng, «Barselona» ochkolari sonini 91 taga yetkazdi va muddatidan oldin Ispaniya chempionligini rasmiylashtirdi. Madridning «Real» jamoasi esa 77 ochko bilan ikkinchi pog‘onada qolmoqda. Chempionat yakunlanishiga 3 tur qolgan bir paytda, «Barselona» o‘z tarixida 29-marta mamlakat chempionligini nishonlaydigan bo‘ldi.
Navbatdagi turda Hans-Diter Flik shogirdlari 13 may kuni safarda «Alaves» mehmoni bo‘lishadi. Alvaro Arbeloa boshqaruvidagi madridliklar esa bir kun o‘tib o‘z maydonlarida «Oviedo»ni qabul qilishadi.
