La Liga. «Barselona» derbida «Espanyol»ni yirik hisobda magʻlub etdi
Ispaniya La Ligasining 31-turi doirasida «Barselona» hamda «Espanyol» jamoalari o‘rtasidagi uchrashuv yakuniga yetdi. Ushbu bahsda mezbonlar 4:1 hisobida ishonchli g‘alabani qo‘lga kiritishdi.
Uchrashuvning 10-daqiqasida «Barselona» hujumchisi Ferran Torres hisobni ochgan bo‘lsa, 25-daqiqaga kelib u dublni rasmiylashtirdi. Mehmonlar yarimhimoyachisi Pol Losano 56-daqiqada oradagi farqni qisqartirishga muvaffaq bo‘ldi. O‘yin yakunlanishi arafasida, 87-daqiqada Lamin Yamal gol urgan bo‘lsa, oradan ikki daqiqa o‘tib Markus Reshford mehmonlar darvozasini to‘rtinchi bor ishg‘ol qilib, yakuniy hisobni o‘rnatdi — 4:1.
Ushbu g‘alabadan so‘ng «Barselona» 31 o‘yindan 79 ochko jamlagan holda turnir jadvalida peshqadamlikni davom ettirmoqda. «Espanyol» esa 38 ochko bilan 10-pog‘onadan joy olgan.
Navbatdagi turda «Barselona» 25 aprel kuni safarda «Xetafe» mehmoni bo‘ladi, «Espanyol» esa 27 aprel kuni o‘z maydonida «Levante»ni qabul qiladi.
