La Liga. «Atletik» o'z maydonida «Osasuna»ni minimal hisobda magʻlub etdi
Ispaniya La Ligasining 33-turidan o‘rin olgan «Atletik Bilbao» va «Osasuna» jamoalari o‘rtasidagi uchrashuv yakuniga yetdi. O‘yin Bilbaodagi «San-Mames Barriya» stadionida bo‘lib o‘tdi. Bahsni bosh hakam Viktor Garsiya Verdura boshqarib bordi. Unda mezbonlar 1:0 hisobidagi g‘alabani qo‘lga kiritishdi.
Uchrashuvdagi yagona golni 16-daqiqada «Atletik» hujumchisi Gorka Guruseta kiritishga muvaffaq bo‘ldi. O‘yinning 90+1-daqiqasida mezbonlar yarimhimoyachisi Mikel Xaurexisar ikkinchi sariq kartochka tufayli maydondan chetlatildi.
Ispaniya chempionatining 32 ta o‘yinidan so‘ng «Atletik Bilbao» 41 ochko jamg‘argan holda turnir jadvalida to‘qqizinchi o‘rinni egallab turibdi. «Osasuna» esa 39 ochko bilan 10-pog‘onadan joy olgan.
Chempionatning navbatdagi turida «Atletik» safarda Madridning «Atletiko» jamoasi bilan kuch sinashadi (25 aprel), «Osasuna» esa bir kun o‘tib o‘z maydonida «Sevilya»ni qabul qiladi.
