Kuman: «Dumfris «Real»dami? Uning «Barselona»ga o‘tishini afzal ko‘rgan bo‘lardim»
Niderlandiya terma jamoasi bosh murabbiyi Ronald Kuman "apelsinranglilar" va "Inter"ning o‘ng qanot himoyachisi Denzel Dumfrisning Madridning "Real" klubiga o‘tishi haqidagi xabarlarga munosabat bildirdi.
"Transfer to‘liq yakunlangani yo‘qmi, bilmayman, biroq kimdir bunday o‘tishga loyiq bo‘lsa, aynan u. Lekin men uning ‘Barselona’ga o‘tishini afzal ko‘rgan bo‘lardim", — deya Kumanning so‘zlarini keltiradi AS.
Eslatib o‘tamiz, Kuman 1989 yildan 1995 yilgacha "ko‘k-anorranglilar" safida to‘p surgan. Shuningdek, niderlandiyalik mutaxassis 2020 yildan 2021 yilgacha Kataloniya klubi bosh murabbiyi lavozimida ishlagan.
O‘tgan mavsumda Dumfris barcha musobaqalarda 28 ta o‘yinda ishtirok etib, beshta gol va ikkita golli uzatmaga mualliflik qilgan.
Futbolchining klub bilan amaldagi mehnat shartnomasi 2028 yilning yozigacha mo‘ljallangan. Transfermarkt portalining ma’lumotiga ko‘ra, futbolchining bozor qiymati 25 million yevroni tashkil etadi.
