Konor Bredli jarohati sabab mavsumning qolgan qismini oʻtkazib yuboradi — Sky Sports
«Liverpul» klubi o‘zining rasmiy sayti orqali o‘ng qanot himoyachisi Konor Bredlining jiddiy jarohat olgani haqida ma’lum qildi.
«O‘ng qanot himoyachisi payshanba kuni kechqurun bo‘lib o‘tgan Premer-liga doirasidagi «Arsenal»ga qarshi uchrashuvning so‘nggi daqiqalarida jarohat oldi. Yaqin kunlarda Bredli jarrohlik amaliyotini boshdan kechiradi, shundan so‘ng u mashg‘ulot bazasida reabilitatsiya jarayonini boshlaydi. Hozircha uning maydonga qachon qaytishi borasida aniq ma’lumot yo‘q», — deyiladi klub bayonotida.
Sky Sports xabariga ko‘ra, 22 yoshli futbolchi joriy mavsumning qolgan qismini o‘tkazib yuboradi.
Joriy mavsumda Konor Bredli barcha musobaqalarda 21 ta uchrashuvda maydonga tushib, 2 ta golli uzatma muallifiga aylangan. Futbolchining «Liverpul» bilan amaldagi shartnomasi 2029 yil yoziga qadar mo‘ljallangan. Transfermarkt portali ma’lumotlariga ko‘ra, Bredlining bozor qiymati 30 million yevroni tashkil etadi.
