KONMEBOL prezidenti 2030-yilgi Jahon chempionatini 64 ta jamoa bilan o'tkazishni taklif qildi
Janubiy Amerika futbol konfederatsiyasi (KONMEBOL) prezidenti Alexandro Dominges Xalqaro futbol federatsiyasiga (FIFA) 2030-yilgi Jahon chempionati ishtirokchilari sonini 64 taga yetkazish taklifi bilan murojaat qildi.
2030-yilgi Jahon chempionatiga Ispaniya, Portugaliya va Marokash mezbonlik qiladi. Shuningdek, mundialning ochilish o'yinlari Urugvay, Argentina va Paragvayda bo'lib o'tadi.
“Ishonchimiz komilki, 100 yillik yubiley noyob bo'ladi, chunki 100 yil faqat bir marta keladi. Shuning uchun biz ushbu turnirni bir vaqtning o'zida uchta qit'ada 64 ta jamoa ishtirokida o'tkazishni taklif qilamiz”, - deydi Dominges.
Eslatib o'tamiz, 1998-yildan boshlab Jahon chempionatlarida 32 ta jamoa ishtirok etib kelayotgandi. 2026-yilgi mundialda esa jamoalar soni 48 taga yetkazildi.
