“Komo” Yan Koutoni ijaraga oldi
Italiyaning “Komo” klubi Dortmundning “Borussiya” jamoasi himoyachisi Yan Koutoni o‘z safiga qo‘shib olganini rasman e’lon qildi.
Kelishuv ijara asosida tuzilgan bo‘lib, braziliyalik futbolchi 2026/27-yilgi mavsum yakuniga qadar “Komo” sharafini himoya qiladi.
23 yoshli Kouto “Koritiba” klubi tarbiyalanuvchisi hisoblanadi. U 2020-yilda “Manchester Siti”ga o‘tgan, keyinchalik “Jirona” va “Braga” klublarida ijara asosida to‘p tepgan. 2025-yilda esa Dortmundning “Borussiya” jamoasi futbolchisiga aylangan.
“Komo” bosh murabbiyi Sesk Fabregas yangi futbolchining texnik imkoniyatlari, hujumlarga faol qo‘shilishi va yuqori ishchanligini alohida ta’kidlab, Kouto jamoaning o‘yin uslubiga mos tushishini qayd etdi.
Yan Kouto Braziliya U-17 terma jamoasi bilan 2019-yilgi Jahon chempionatida g‘olib chiqqan. Shuningdek, u Braziliyaning asosiy milliy terma jamoasida ham debyut qilishga ulgurgan.
