“Komo” Moyze Kin uchun ikkinchi taklifni tayyorlamoqda
Italiyaning “Komo” klubi “Fiorentina” hujumchisi Moyze Kinni o‘z safiga qo‘shib olish niyatidan qaytmagan. Fabritsio Romano ma’lumotiga ko‘ra, Sesk Fabregas jamoasi 26 yoshli futbolchi uchun ikkinchi taklifni tayyorlamoqda.
“Komo”ning dastlabki taklifi 30 million yevroni tashkil etgan. Shundan 5 million yevro ijara uchun, qolgan 25 million yevro esa keyinchalik majburiy sotib olish sharti asosida to‘lanishi ko‘zda tutilgan edi.
“Fiorentina” bu taklifni rad etdi, biroq muzokaralar to‘xtamagan. “Komo” yaqin vaqt ichida yaxshilangan shartlar bilan yana murojaat qilishi kutilmoqda. Hozircha yangi taklifning aniq summasi ma’lum emas.
Ma’lumot uchun, Kin 2026/27-yilgi mavsumda Italiya kubogida bitta uchrashuv o‘tkazib, gol urishga ulgurgan. Uning “Fiorentina” bilan shartnomasi 2029-yil 30-iyunga qadar amal qiladi, Transfermarkt esa futbolchining bozor qiymatini 32 million yevroga baholamoqda.
