Kodi Gakponing oilasida og‘ir judolikka uchradi
“Liverpul” va Niderlandiya terma jamoasi hujumchisi Kodi Gakponing sevgilisi Noa van der Bey oilasida yuz bergan og‘ir yo‘qotish haqida ma’lum qildi.
U ijtimoiy tarmoqdagi sahifasi orqali homiladorlik vaqtida farzandini yo‘qotganini bildirdi. Noa van der Bey ushbu xabarni chuqur qayg‘u bilan e’lon qilib, yaqinlari va muxlislarga qo‘llab-quvvatlagani uchun minnatdorlik bildirdi.
Uning ma’lum qilishicha, farzandga Elayja Rafael Gakpo deb ism qo‘yilgan. Noa o‘z xabarida farzandi doimo ularning qalbida qolishini ta’kidlagan.
Shuningdek, u voqeadan so‘ng oilasi bilan cherkovga borib, sham yoqqanini aytgan. Keyin ular o‘g‘li Samuel bilan cherkov maydonchasiga chiqqan. U yerda uchratgan bolaning ismi ham Elayja bo‘lgani oilaga ramziy tasalli bergan.
Mazkur xabar futbol jamoatchiligi va muxlislar orasida hamdardlik bilan kutib olindi. Ko‘plab foydalanuvchilar Kodi Gakpo va uning oilasiga sabr tilab, ularga qo‘llab-quvvatlov bildirmoqda.