Klublardan daraklar | «Xorazm» nazorat uchrashuvida «Lochin»ni mag‘lub etdi
Klublardan daraklar | «Xorazm» nazorat uchrashuvida «Lochin»ni mag‘lub etdi
XXX milliy chempionatga tayyorgarlik ko‘rayotgan Oliy liga jamoalari yangi mavsum oldidan o‘yin amaliyotiga alohida e’tibor qaratmoqda.
Toshkentdagi «Yunusobod» sport majmuasida Oliy liga debyutanti «Xorazm» yangi tashkil etilgan «Lochin» jamoasiga qarshi nazorat uchrashuvida maydonga tushdi. Bahsda urganchliklar ishonchli g‘alabaga erishdi – 3:0.
«Xorazm» safida gollarga Soares Henrique (2 ta) va Bobir Razzoqberganov mualliflik qildi.
Mazkur uchrashuv «Xorazm» uchun mavsumoldi tayyorgarlik doirasidagi to‘rtinchi nazorat bahsi bo‘ldi. Ahad Yusupov shogirdlari esa ilk bor nazorat uchrashuvida o‘z kuchlarini sinovdan o‘tkazdi.
Uchrashuv davomida «Xorazm»ning o‘yin amaliyoti va jamoaviy harakatlari ancha shakllanganligi ko‘zga tashlandi. «Lochin» tarkibida esa yangi futzalchilar ko‘rikdan o‘tkazilmoqda.
Shuningdek, namanganliklar safiga Eron Islom Respublikasidan bir qator legioner futzalchilar kelib qo‘shilgan. Ular sinovdan muvaffaqiyatli o‘tgan taqdirda, klub bilan shartnoma imzolashi kutilmoqda.
Jamoalar uchun yangi mavsum oldidan bunday nazorat uchrashuvlari tarkibni shakllantirish va optimal o‘yin uslubini topishda muhim ahamiyat kasb etadi.
