Keyn «Bavariya» bilan shartnomani uzaytirish bo‘yicha muzokaralarni to‘xtatib turdi — Plettenberg
"Bavariya" hujumchisi Harri Keyn klub bilan shartnomani uzaytirish bo‘yicha muzokaralarni vaqtincha to‘xtatdi. Bu haqda jurnalist Florian Plettenberg X ijtimoiy tarmog‘ida xabar bermoqda.
Manbaga ko‘ra, futbolchi e'tiborini jahon chempionatiga qaratgan. Yangi shartnoma bo‘yicha muzokaralar turnirdan so‘ng qayta boshlanishi kutilmoqda.
Shunga qaramay, tomonlar o‘rtasida 2029 yilgacha hamkorlik qilish bo‘yicha dastlabki aloqalar allaqachon bo‘lib o‘tgan.
Shuningdek, Keyn boshqa klublar bilan muzokaralar olib bormayotgani va "Bavariya"da qolish niyatida ekani xabar qilingan.
Eslatib o‘tamiz, Keyn Myunxen klubida 2023 yilning yozidan buyon to‘p surmoqda. Amaldagi kelishuv 2027 yilda yakuniga yetadi.
O‘tgan mavsumda Harri Keyn nemis jamoasi safida barcha turnirlarda 51 ta o‘yin o‘tkazib, 61 ta gol urdi va yettita golli uzatmani qayd etdi.
